सामान्य प्रशासन विभाग हा जिल्हा परिषदेअंतर्गत पंचायत समितीमध्ये एक महत्वाचा विभाग आहे. गट विकास अधिकारी हे या विभागाचे प्रमुख असतात. गट विकास अधिकारी यांची मान्यता आवश्यक असणाऱ्या पंचायत समिती कार्यालय व अंतर्गत्‍ कार्यालयांतील सर्व प्रशासकीय प्रस्ताव-प्रकरणे यांची छाननी करुन सादर करण्याचे काम या विभागामार्फत केले जाते.

तालुक्यांतर्गत असणारे गट शिक्षणाधिकारी, बाल विकास प्रकल्प अधिकारी, जिल्हा परिषद बांधकाम / सिंचाई / ग्रा. पा. पु. उपविभाग, प्राथमिक आरोग्य केंद्र, पशुवैद्यकीय दवाखाने, प्राथमिक शाळा, अंगणवाडया यांचेमार्फतीने राबविणेत येणाऱ्या शासनाच्या वेगवेगळ्या विकास योजनांची अंमलबजावणी प्रभावीपणे व यशस्वीपणे झाली आहे किंवा नाही. त्याचप्रमाणे प्रशासकीय कामांचा आढावा, याची पाहणी करणे आवश्यक असणारे मार्गदर्शन करुन कामामध्ये गतीमानता व सुधारणा करणेचा प्रयत्न केला जातो. या विभागामार्फत समता दिन, दहशतवाद व हिंसाचार विरोधी दिन, क्रांती दिन, सद्भावना दिवस, संकल्प दिन, एकता सप्ताह, हुतात्मा दिन या बरोबर प्रजासत्ताक दिन, स्वातंत्र दिन, कामगार दिन तसचे शासनाद्वारे निर्देशीत केलेले कार्यालयांत साजरे करावयांचे जयंती / राष्ट्रीय दिन इ. कार्यक्रमांचे आयोजन व अंमलबजावणी यावर नियंत्रण व परिरक्षण केले जाते.

 
पंचायत राज समिती, अनुसूचित जाती कल्याण समिती, इतर मागासवर्गीय कल्याण समिती, वि. जा. भ. ज. कल्याण समिती, अनुसूचित जमाती कल्याण समिती, महिला हक्क व बालकल्याण समित्या भेट देतात. समित्यांचे भेटी कार्यक्रमावेळी माहितीचे एकत्रीकरण व सादरीकरण या विभागामार्फतीने केले जाते.

 
जिल्हा परिषदेमार्फत राबविणेत येत असलेल्या विविध योजना व विकास कामांचा आढावा व मार्गदर्शन करणेसाठी तालुक्यांतील उप अभियंता , गट शिक्षणाधिकारी व बाल विकास प्रकल्प अधिकारी यांची मासिक बैठक आयोजित केली जाते. या बैठकीचे नियोजन विभागामार्फत केले जाते. तसेच गट विकास अधिकारी, जिल्हा परिषद यांची विभागीय स्तर व राज्य स्तरावरील बैठकीसाठ लागणाऱ्या आवश्यक माहितीचे एकत्रीकरण या विभागामार्फतीने करणेत येते. मा. लोक प्रतिनिधी व वरिष्ठ अधिकारी ज्या वेळी तालुक्याच्या भेटीकरिता येत असतात, त्यावेळी विकास कामे व आस्थापना विषयक बाबी संदर्भात माहिती या विभागामार्फत दिली जाते. राजीव गांधी प्रसासकीय गतीमानता(प्रगती) अभियान दरवर्षी 20 ऑगस्ट ते 2 ऑक्टोंबर या कालावधीत राबविली जाते. अभियानांतर्गत कार्यालय सुशोभिकरण, अभिलेख वर्गीकरण, कार्यायीन वातावरणात सुधारणा व स्वच्छता कार्यपध्दती सुलभीकरण, ई-गव्हर्नन्स, खर्चात काटकसर, प्रशासन लोकाभिमुख करणे, कर्मचाऱ्यांचे आस्थापना विषयक बाबी अद्यावत करणे इत्यादी बाबी अभियांनांतर्गत राबविणेत येतात. सामान्य प्रशासन विभागामार्फत कार्यरत सर्व अधिकारी व कर्मचारी यांना दैनंदिन कामकाजामध्ये उद्भवणाऱ्या अडचणी संदर्भात मार्गदर्शन या कार्यालयांमार्फत करण्यांत येते.